Cиэр аппын миинэммин, Cэгэртэйбэр тиийиэҕим. Хара аппын миинэммин, "Харатыайбар" барыаҕым. Үөмэс-амас дайбатан, Үөрэ-дьүөрэ үктэтиэм. Тоҕус суукка тухары Дьоруоллатан дайдарыам. "Чэмэлиинэм" алааһын Сирэм күөҕүн үрдүнэн Сиэллэрбэхтээн сэгэтиэм "Амыдайы" уҥуордаан. "Кутааманы" ааһахтаан Тохтообокко көтүтүөм. Тоҕус уонча көстөрдөөх Доҕоччукпар тиийиэҕим. Сиэр аппын илдьэммин Сэргэлэргэ баайыаҕым. Ааны аһа баттааммын Ампаар дьиэҕэ киириэҕим. Хаана-сиинэ тэтэрбит "Харатыайбын" көрсүөҕүм. Кырдьык-чахчы кытаран Кылап-халап көрүөҕүм. Итии таптал уотугар Иирэн-хорон олорон. Илиититтэн тутуоҕум, Ытыктыырым бэлиэтин. Ыччат киэһэ дьолунан Ыгы-ыыга кууһуоҕум. Үлэ-хамнас туһунан Үөрэ-көтө кэпсэтиэм.