Манна кэллэммин таптыыбын дойдум сылаас тыынын. Эбэм үрдүгэр олороммун мин уоскутуна сатыыбын. Өрүһүм долгуннара долгуйаллар ыраахха дылы, Сипсийэммин этэбин мин ахтылҕаным тылларын. Ханна да барыам суоҕа, бу мин өбүгэм дойдута, Мин иннибинэ үгүс дьонум уһуктубаттыы утуйбута. Мин да кэмим кэллэҕинэ кинилэр тастарыгар сытыам, Онтон билигин кэскилим туһугар бэйэбин харыстыам. Барыта баар буолуо бу сиргэ, бу күн анныгар. Ити билигин эрэ бааллар тулабытыгар таабырыннар. Сүрэҕи таарыйарга дылы үрүҥ күнүм сардаҥата, Аптаах хомуһум саҥата, күн сырдыга, түүн хараҥата. Махтанабын бу сиргэ, манна эрэ мин билбитим Күлүмүрдүүр көмүс күһүн хатыламмат кэрэлэрин, Тымныы кыһын тыйыс тыынын, сандал саас сылааһын, Самаан сайын куйааһынан быстахтык кэлэн ааһарын. Манна эрэ баар уйулҕаны долгутар-уоскутар Үс саханы үөскэппит биһи сүргэбит үс кута, үтүө дьоно Айыы тойон таҥаралаах сырдык киһи Ханна да тиийдин сүтэрбэт кини бэйэтин силиһин. Аны көстөн кэлэр эҥин-араас көмүстэринэн. Биир кыырпаҕы булаары долгуйар сүрэхтэрэ. Ону барытын тулуйбат, кини да баайа баранар, Кини эмиэ тэбэр сүрэхтээх, онто эмиэ салгытар. Хайа да сирдэртэн ордоробун алаастарбын, Өрүстэрбин, кытылларбын ханна да мин хайыстарбын. Сайыстахпа сүрэхпэр баар бүтэһик күннэрбэр дылы Мин саарыы остоох саастарбар сүүрбүт-көппүт кырдалым. Аны мантан кынаттанан айбыт тылым көппүтэ, Тоҥуй сүрэҕим толкуйу ыйан биэрэн көрдөрбүтэ. Сүтэрбит сүдү сүтүгүм манна кэлэн көстүбүтэ, Ол мин дойдум тыынын туһугар уурбут бэлэҕим этэ... Кыыс хатыҥ лабаалара санаталлар күндү киһибин. Мин таптыыр доҕорбун, олоҕум аргыһын этэбин. Кинини мин булбутум бу дойдуга, күн анныгар. Күн көрөн турдаҕына билиммитим мин тапталбар. Онтон ылата сыһыаммытын харыстыыр айылҕа Күөх хонуу, нэлэмэн сыһыы, хара тыа, баай тайҕа. Дойдубут тыына бэлэхтиир биһиэхэ кэрэ кэмнэри, Үтүө үгэстэри салҕыахпыт диэн эрэннэрэбит. Кини көстөр миэхэ сарсыардааҥҥы сардаҥанан, Илгийэр өрүү сылааһынан уонна тапталынан... Барыта баар этэ быданнаабыт былыргыттан, Таммах түһэр этэ субу курдук бороҥ былыттартан. Онтон ылата туох да уларыйа илик өссө, Арай ардыгар сир тымырыгар баас көстөр. Киһи харыстыыр айылҕатын айгыратан эрэр, Ити барыта алдьатыы аргыстаах аныгы кэмнэр... Төрөөбүт ийэ буоргун харыстаа, Тапталгын булбут ытык сиргин харыстаа, Айгыр силик айылҕаҕын харыстаа, Өбүгэҥ дойдутун, Саха Сирин харыстаа.